Հետխորհրդային շատ երկրներ են վերջերս դարձել ԵՄ անդամ պետություն կամ ստացել են ԵՄ թեկնածու երկրի կարգավիճակ։

Գյուղատնտեսությունը և գյուղի զարգացումը առաջնահերթ դեր են խաղում ԵՄ քաղաքականության մեջ ներգրավվող երկրների համար։ Հետևաբար քաղաքականություն մշակողների համար չափազանց կարևոր է լիովին հասկանալ ԵՄ երկրներում գյուղատնտեսական քաղաքականության մշակման, ֆինանսավորման, իրականացման, մոնիտորինգի, գնահատման և հաշվետվության ինստիտուցիոնալ կառուցվածքը՝ ճիշտ ռազմավարական և կայուն որոշումներ կայացնելու համար: Բացի այդ, շատ կարևոր է այս հաստատությունների միջև տեխնիկական, ֆինանսական և վարչական փոխգործակցությունը:

Ավստրիական զարգացման գործակալության ֆինանսավորմամբ 2023 թվականի հոկտեմբերի 1-ից 5-ը ավստրիական «ԱգրարՄարքտ» պետական գործակալության հրավերով եռօրյա այցով Ավստրիայում էր ՀՀ ԱԺ տարածքային կառավարման, տեղական ինքնակառավարման, գյուղատնտեսության և շրջակա միջավայրի հարցերի մշտական հանձնաժողովի նախագահ Վահե Ղալումյանի գլխավորած աշխատանքային խումբը։ Այցի նպատակն էր բարձրացնել բարձրաստիճան պաշտոնյաների իրազեկվածությունը և ծանոթացնել նրանց գյուղատնտեսական քաղաքականության իրականացման պահանջներին ու դրա ինստիտուցիոնալ կառուցվածքին։

Այցի ընթացքում աշխատանքային խումբն ուսումնասիրեց հետևյալ հարցերը․

Ավստրիայի գյուղատնտեսության, անտառային տնտեսության, տարածաշրջանների և ջրային ռեսուրսների կառավարման դաշնային նախարարությունում (քաղաքականություն մշակող և ԵՄ հետ բանակցող)

➢Կառուցվածքը, դերերն ու պատասխանատվությունը,

➢Գյուղատնտեսական քաղաքականության ֆինանսական պլանավորում և ֆինանսավորում,

➢Ավստրիական նոր CAP (Common Agricultural Policy` ընդհանուր գյուղատնտեսական քաղաքականություն) ռազմավարական ծրագիր (ԵՄ կողմից հաստատված),

➢ Հաստատություններ, որոնք ներգրավված են քաղաքականության մշակման և իրականացման գործընթացում,

➢Գյուղատնտեսական համալսարանների և քոլեջների դերը,

➢Համագործակցություն և փոխգործակցություն համապատասխան կառույցների միջև և գյուղատնտեսական կոոպերատիվների դերը։

ԱգրարՄարքտ Ավստրիա (AMA-ԱՄԱ) (վճարային գործակալություն, բիզնես գործընթացների թվայնացում)

➢Կենդանիների համարակալման և հաշվառման համակարգ, օրենքներ և կանոնակարգեր,

➢Փոքր սպանդանոցների դերը Ավստրիայի գյուղական համայնքներում,

➢ Վերահսկողական գործառույթներ,

➢Համագործակցություն այլ կապակցված հաստատությունների հետ,

➢Ինտեգրված կառավարման և վերահսկման համակարգի էլեմենտներ (IACS- Integrated administration and control system) և ՏՏ կարևորությունը,

➢Վճարումներ ըստ տարածքի,

➢Գյուղատնտեսական շուկաներ, շուկայի և գների մոնիտորինգ և հաշվետվություն

Տարածաշրջանային այցեր․

Ավստրիայի ստորին շրջանների տարածաշրջանային անասնաբուժական ծառայություն (խորհրդատվական ծառայություն, կրթություն, ուսուցումներ, ֆերմերային առաջնային աջակցություն) 

➢Տարածաշրջանային անասնաբուժական ծառայության կառուցվածքը, դերերն ու պատասխանատվությունը,

➢Անասնաբուժական վերահսկողություն և սննդի անվտանգություն,

➢Փոքր սպանդանոցների գրանցում,

➢Անասնաբույժի պատասխանատվությունը սպանդի և մսի կտրատման գործընթացներում։

Գյուղատնտեսական դպրոց

➢Երիտասարդների կրթություն, ուսուցումներ մեծահասակների համար գյուղատնտեսության և սննդի տեխնոլոգիաների թեմաներով։